Qeybtii 19-aad

XASILOONIDA NAFTA

Beri baa waxaa la yii nin safar ah ayaa waxaa uu ka lumay safar kale oo uu la socday, sidii uu bacaadkii iyo saxarihii u dhex socday oo uu jidkii u raadinayey ayuu wuxuu ka soo kordhacay teendho meel ka dhisan, waxaana teendhada hor fadhisa islaan cajuuso ah, waxaana agteeda jiifa Ey, naagtii ayuu ninkii salaamay isagoo la yaaban, waxa meesha cidlada dhigay, waxayna ku tiri naagtii markay salaantii ka qaaday dooxadaa ku sii soco horteena ah, soona ugaaro xoogaa abeesooyin ah, oo adiga kugu filan si aan kuugu solo oo aad u cunto.

Ninkii wuxuu yiri; "Anigu kuma dhiiran karo inaan abeeso ugaarto"?, islaantii baa waxay tiri; anigaa ku raacaya oo kula soo ugaaranaya ee ha baqin, wayna israaceen eygoodiina wuu raacay, Abeesooyin lamadegaanka iska buuxa ayey dhowr xabo kasoo disheen oo ay iska soo qaateen, teendhadoodii bay la yimaadeen naagtii baa markaa waxay guda gashay inay dubto oo ay shiisho abeesooyinka, ninka markii hore ma uusan rabin inuu cuno hilibka Abeesada, wuxuuse ka baqay inuu gaajo iyo tabar dari u dhinto, xoogaa ayuu markaa hilibkii abeesada ka cunay, hadana waxaa qabtay oon markaasuu wuxuu ka codsaday inay biyo siiso, waxay ku tiri; Misana "ishaas geedka hoostiisa marta aad oo ka soo cab". Ishii buu tagay wuxuuna ogaaday inay bihayeedu kharaad cusbo ah yihiin, isagoo isku qasbaya ayuu xoogaa ka cabay, markuu soo noqday ayuu duqdii wuxuu ku yiri; "naagyahay aadbaan arrintaada ula yaabay, iyo meesha aad deggen tahay, waxa aad cunto iyo waxa aad cabtaba.

Naagtii ayaa waxa ay ku tiri; "adinku baladkiina maxaad ku cuntaan, ninkii wuxuu yii; "magaaladeenu waxay leedahay Guryo waaweyn, qudaar basil, biyo macaan, cunto dhadhan leh iyo hilbo baruur leh. Haweenaydii baa makaa waxay ku tiri ninkii; "waxaas oo dhan magaalo waan ku maqli jiray ee waxaad iiga warantaa ka waran boqoada idin xakuma, mar-mar soo xoolahiina idinkama qaataan oo guryihiina idinkama saaraan?" ninkii wuxuu yiri; "Mar-mar arintaasi way dhacdaa" waxay ku tiri hadana naagtii; "mar hadday sidaasi tahay noloshaa oo dhan ee wanaagsan ee aad soo sheegtay oo dulmi la jiro waxay la mid tahay sun wax disha oo kale, waxay la mid tahay laakiin noloshan hadda aan ku noolahay oo kale oo nabadgelyada iyo caddaaladu la jirto waxay la mid tahay wax macaan oo barwaaqo ah oo kale, hooyo miyaadan maqal nimcada ugu wanaagsan Islaanimada ka sokow waa inuu yahay caafimaadka iyo nabadgelyada?"

NAAGTII CAQLIGA BADNEYD.

Beri baa Islaan waayeel ah waxaa ku adkaaday waqtiga, aadna waxay u dareentay saboolnimo, mana ayan helin wax ay cunto, waxay aaday Xaakimkii Magaalada, si aywax ay ugu noolaato uga soo hesho, markay u soo gashay ayey waxay aragtay isagoo ay niman badan la fadhiyaan, way ka xishootay markaa, umana aanay sheegan wixii ay doonaysay, hase yeeshee markay isa sii laabtay ayuu xaakimkii arkay wuxuuna ku yiri; "soo dhawow islaan yahay, maxaadna doonaysay? In yar bay aamustay markaasay tiri: "Xaakinow waxaan dacwo ka ahay gurigayga oo uu jiirku ku yaraaday darteed" xaakimkii wuu gartay ujeeada Islaanta, wuxuuna u yeeray mid ka mid ah dadkii bakhaarada u hayey, wuxuuna ku yiri "Naagtaa gurigeeda ka buuxiya timir iyo sareen". Naagtiina way noqotay iyadoo aad u faraxsan, hadana wuxuu ku yiri nimankii xaakimka la fadhiyey "ma fahamteen ujeedada naagta" waxay yiraahdeen "maya", wuxuu ku yiri: "danbay laheyd idinka ayey idinka xishootay, waxayna ka waday hadalkeeda 'gurigaygu waa eber oo xataa ma lahan wax uu jiirku ka cuno dad iska daaye'. Dadkiina markaa waxay la yaabeen markaa caqli badnida naagta.

Qeytbtii 18-aad halkaan ka Aqriso