Maamulka Xisbul Islaam ee gobolka Gedo ayaa waxay shaaciyeen inay cafis u fidiyeen xubnihii ka tirsanaa Maamulkii hore ee gobolka Gedo ee dawladda federalka Soomaaliya oo haatan ku sugan degmada Doolow ee gobolka Gedo halkaasi oo ay ka wadaan guluf colaadeed oo ay doonayaan inay mar kale ku hantaan gacan ku haynta degmooyinka gobolka Gedo oo ay maamulaan xoogagga Xisbul islaam iyo Al-shabaab.

Afhayeenka Xisbul Islaam ee gobolka Gedo Sheekh Farxaan Cabdi Cilmi Mooge oo saxaafada la hadlayay ayaa waxa uu sheegay inay cafis u fidiyeen xubnihii Maamulkii hore ee gobolka Gedo ee ku sugan degmada Doolow, wuxuuna ugu baaqay xubnahaasi inay ka faa’idaystaan cafiska loo fidiyay isla markaana ay dib ugu soo laabtaan guryahooda, waxna la qaybsadaan walaalahooda.

“Ma doonayno in lagu kor dagaallamo shacabka gobolka Gedo oo ay abaaruhu halakeeyeen, waxay u baahan yihiin nabad, waxaana waajib ah in nabaddaasi laga wada shaqeeyo oo miiska wada hadalka laysugu yimaado” ayuu yiri afhayeenka Xisbul Islaam ee gobolka Gedo Sheekh Farxaan Cabdi Cilmi Mooge oo intaasi ku daray inay cafiska ay u fudiyeen xubnahaasi uu furan yahay.

Hadalka afhayeenka Xisbul Islaam ee gobolka Gedo ee ku aadan inay cafis u fidiyeen xubnihii Maamulkii dawladda federalka ee gobolka Gedo ayaa imaanaya xilli muddooyinkii ugu dambeeyay ay Masuuliyiinta, saraakiisha iyo xildhibaanada ka soo jeeda gobolka Gedo ay ku goodinayeen inay weerari doonaan oo ay dib gacanta dawladda ugu soo celin doonaan degmooyinka gobolka Gedo.