---

Qeybtii 10-aad

BILAN IYO BAAS QABE

Waxaa layiri beribaa Oday baasqabe la oran jiray ayaa wuxuu dhalay Gabar bilan layiaahdo oo aad u qurux badan waagii dambe ayaa gabadhii laga guursaday, markii muddo laga joogay ayaa intuu xoolo badan oo dhibaad ah raaciyay ayuu reerkii ka guursaday u wareejiyay, markey sanooyin badan kala maqnaayeen ayaa baasqabe wuxuu ku tashaday in uu gabadhiisii bilan ka war doono wax tarna u doonto, markii uu sadex caano maal sii socday ayuu galabtii dambe yimid halkii ay yaaleen rerkii ay gabadhiisu la daganeyd markiiba waxaa lakeenay baaqabe gurigeedii iyaduna markiiba si diiran ayey Aabeheed usoo dhawysay waxeyna hoos galbeedka guriga wac ugu siisay gogol weyn waxayn u keentay caano iyo hilib oodkac ah oo ninkeeda oo maqan ay dhigaal uga dhigtay, markii gabalkii dhacay ee ay xoolihii guriga sida weelal culidda iyo xoola lisiddii, waxey awowgii soo ag seexisay wiil lix bilood jir ah oo ay haysatay, wan qoolis ah oo ariga aad u laayana waxay ku soo xirtay guriga kaadkiisa waxayn bilowday in ay xoolohii soo maasho, in yar kadibna waxey Aabeheed baas qabe u keentay haruub weyn oo caano ah, waxeyna ku noqotay xeradii xoolaha, odaygii baasqabe caanaha ay gabadhiisu u keentay waxaa uga darnaa oo uu maanka ku hayay macaankii iyo dhadhankii wanaagsanaa ee oodkicii ay gabadhiisu galabta siisay wuxuuna goostay inta ay gabadhiisu ku maqantahay xerada xoolaha intuu qori dab ah qaato oo gurigii Cawska ahaa la galo in uu ku soo raadsado weelkii ay gabadhu galabta hilibka uga soo gurtay, intuu gurigii oo mugdi ah qorigii dabka ahaa la xaluushay ayuu wilfis iyo afuufid ku bilaabay intii aanu si fiicanba wax u arkin wuxuu maqlay wankii banaanka ku xirnaa oo caanihii ay gabadhu u keentay cabaya oo fuuqfuuq leh intuu markiiba isagoon is ogeyn qorigii dabka ahaa gurigii ku dhex tuuray ayuu wankii caanaha ka gaaray intuu wankii gafuurka soo qabtay ayuu toorey uu xirnaa labada faruuryood kaga gooyay gurigiina bug buu yiri oo dab baa qabsaday, hal ay gabadhu markaasi lisaysay oo guriga gadaashiisa taagneyd naxdintii intay booday ayey laf dheerta ka haaday, oday baasqabe mashaakilbaad sameysay carar markuu is yiri wuxuu baacuunka kaga sii joogsaday cunigii yaraa ee agtiisa la soo seexiyey hore ayuuna usii cararay oo tuuladii isaga baxay, isagoo dhexdii sii socda ayaa waxaa ka hor yimid baa layiri ninkii, gabadhiisa qabay buu ahaana wa layiraahdaa, nin kaluu ahaana waa layiraahdaa oo dadku qaarba si ayey u sheegaan wuxuuna ka wareystay dagmadii uu ka yimid iyo sidii lagu ahaa, isagoo anfariir ka muuqdo.

Oday Baasqabe oo ninkii sii dhaafaya ayuu ku yiri degamada waa lagu fiicnaa wax dhib ahna lama sheegeyn laakiin….. buul baa gubtay oo ololaa la lahaa halbaa booday oo jabtaa la lahaa wanbaa sambacaraar go’ay baa la lahaa, wiil baa buqay oo buruuraa la lahaa, tii bilan ahayd ee uu baasqabe dhalay ayaa meelaha ba’ayeeyda heysaa la lahaa!!.

NIN IYO AFADIISA

Waxaa la yiri beri hore ayaa qoys Soomaaliyeed oo meel degan waxaa dhibay oo xoolaha aad uga cuni jiray waraabe, meesha ay deganaaayeen oo aad u dhurwaa badneyd awgeed, maalintii dambe markay dhibaatadaas u adkeysan waayeen meeshuna tahay meel xoolaha u wanaagsan ayaa waxay goosteen ninkii iyo afdiisii cawrala in ay waraabaha dabin (shabaq) u dhigaan, fiidkii markay ahayd ayay waraabayaashii mid kamid ah dabinkii loo dhigay ku dhacya, Cawrala iyo ninkeeda markay arrintaa ogaadeen ayay u yimaadeen waraabihii oo dabinka ku jira, ninkii iyo afadiisa Cawrala mayana dooneyn in waraabaha ay dilaan, oo waxay ka fakareen

xeelad haddii ay ku sameeyaan ay waraabayaasha oo dhan kaga cararayaan halkaas, waxayna goosteen in waraabahaan xanuujiyaan, oo astaan ka duwan waraabayaasha kale u sameeyaan, waxay yiraahdeen waa in aan biyo kulul ku shubnaa waraabaha si uu diirka uga dhaco, markiiba Cawrala waxay bilaawday in ay digsi biyo ah dabka saarto, markay biyihii kululaadeen ayuu ninkii ku yiri Cawralooy!! Isagoo ka wada keen biyaha, markaasaa waraabihii shabaqa ku jiray lugu shubaa bihiyii oo beyl ah, sidaa ayey maalmo ku sameeyeen waraabihii ilaa uu haragii ka dhaco, markii dambe waraabihii wuxuu ogaaday in marka uu ninka yiraahdo Cawralooyba in biyaha kulul lagu shubayo, markaas waraabihii markasta oo ninku cawralooy yiraahdaba wuu sii cabaadaa, waayoo magacaasi ayuu moodaa waxa kululba, maalmo kadib markuu waraabihii bislaaday asi ay naftu ku jirto ayey dabintii ka siidayeen , orod ayuuna keynta xulay, waraabayaashii kale oo saaxiibadiis ahaa ayaa meel fog ka arkay waxan muruxsan ee ku soo ordaya, iyagiina cagta ayey wax ka dayeen, waayo waxey ogaadeen in aanay waxani aheyn waraabe midabkooda oo kale leh, halkaas ayuuna isagiina saxiibadaa gaar is yiraahdaa, iyagiina ay is leeyihiin waxaan ka carara, markii dambe ayey u istaageen si ay u hubsadaan waxani waxa uu yahay, waxayna ogaadeen in uu saaxiibkoodii maqnaa yahay, waxa uuna uga waramay waxa ay ninkii iyo naagtii ku sameeyeen, wuxuuna intaas raaciyey in ay ku shubi jireen wax kulul oo la yiraahdo Cawrala, waraabayaashii markay tashadeen waxay go’aan sadeen in saaxiibkood u gargaaraan oo soo qabtaan ninkaas iyo naagtiisa, Hilibkoodana feentaan, lafahoodana dhuuxaan, arrinaasna si deg deg ah ayey ugu dhaqaaqeen, ninkii iyo naagtii markay arkeen koox waraabayaal ah oo u soo siqaya xagooda ayey nafta la miciin bideen in ay geed dheer dhaladiisa fuulaan, si ay uga badbaadaan dhibaatada waraabayaasha, waraabayaashii taasi ugama ayan harin oo waxay ka fekereen xeelad ay ninka iyo naagta ay geedka ugala soo degaan, waxayna bilaabeen in ay is korkoraan, si ay u gaaraan figta geedka, ninkii iyo afadiisa talo ayaa ku caddaatay waayo waraaabayaashii way ku soo dhawaanayeen marba marka ka dambeysa, nafna wey ka samreen markay kaabiga u soo jiraan ayuu ninkii qaylo ku dhuftay oo yiri war Cawralooy geedka qabso!! Hadalkaas markuu yiri ayey waraabayaashii mar qura daateen,
-9-
waayo waxaa ugu hooseeyey waraabihii muruxsanaa ee magaca cawrala u yaqanay waxa kulul ee lagu gubto, markaasuu ka hos baxay oo mooday in ay ku soo shubayaan wixii kululaa, waraabayaashii markay in door ah saaxiibkood daba cararayeen ayey su’aaleen sababta uu dhulka ugu baaneeyey iyaga oo qarka u saarnaaa in ay ninka iyo naagta soo qabtaan, waxa uu yiri waraabihii gubnaa war iska aamusa wax ma ogidine ninku anigaa afkiisa garanayee wuxuu dalbaday biyihii kululaa ee Cawrala, dhibaato ayaan idinku soo fool laheyd halakii ayeyna ninkii iyo afadiisa uga badbaadeen waraabayaashii.

Qeytbtii 9-aad halkaan ka Aqriso

Lasoco Qeybta Xigta todobaadka Danbe ama Arbacada Danbe

Fiirio Gaar ah:

Waxaa Qorey Cabdulqaadir Nuur Xuseen (Maax)
Wixii talo ama fikrad ah oo la xiriira Buugyarahan
waxaad igala soo xiriiri kartaan Cinwaankayga ah:
E-Mail: cabdiqadirnur@hotmail.com
Tel:00 2522-4150 622