Saraakiil u kala hadashay dawladda federalka Soomaaliya iyo xoogagga ka soo horjeeda ayaa waxay guulo ka sheegteen dagaallo qaraar oo shalay gelinkii dambe ilaa xalay ku dhex maray qeybo ka mid ah degmooyinka Kaaraan iyo Yaaqshiid ee magaalada Muqdisho kaasoo gaystay qasaare nafeed oo soo gaaray dad rayid ah.

Afhayeenka militariga dawladda federalka Soomaaliya Farxaan Carsaanyo oo saxaafadda la hadlay ayaa waxa uu sheegay in kooxoo uu ku tilmaamay inay yihiin nabad diid gacan ka helaya dambilayaal caalami ah ay gabbal dhicii weer ku soo qaadeen fariisimo ay ku sugnaayeen ciidamada dawladda federalka, wuxuuna intaasi ku daray in ay iska caabiyeen isla markaana ay dib ugu celiyeen goobihii ay ka soo duulaan tageen.

Farxaan Carsaanyo wuxuu sheegay in dagaalkaasi ay cidamada dawladda federalka gacanta ku dhigeen labo ka mid ah dagaal yahanada ajnabiga oo dagaalka ula jiray kuwaasoo uu sheegay inay saxaafadda u soo bandhigi doonaan, wuxuuna intaasi ku daray in ciidamada dawladda federalka ay ku durkeen aagag ay horay ugu sugnaayeen xoogagga ka soo horjeeda oo ku yaalla degmada Kaaraan.

Dhinaca kale afhayeenka Xisbul Islaam Sheekh Muuse Cabdi Caraale oo isagana la hadlayay saxaafadda ayaa waxa uu sheegay inaanay waxba ka jirin guusha ay sheeganayaan saraakiisha dawladda federalka oo ay ku daboolayaan qasaaraha iyo jabka soo gaaray, wuxuuna intaasi ku daray inay Mujaahidiinta la wareegeen gacan ku haynta goobo muhiim, isagoo dhinaca kalena beeniyay inay jiraan rag ka tirsan Mujaahidiinta oo ay gacanta ku dhigeen ciidamada dawladda federalka Soomaaliya.