Waxaa xalay fiidkii weeraro loo adeegsaday bambaanooyinka gacanta laga tuuro oo ilaa labo xabo ah lagu qaaday nawaaxiga hoy uu degmada Xamarjajab ka deggan yahay guddoomiyaha degmadaasi, kaasoo gaytay qasaare dhaawac u badan oo soo gaaray dad rayid ah oo deris la ah hoyga bambaanooyinka lagu weeraray.

Qaraxa kaddib ayaa waxaa xigay is rasaasayn socotay qaddar 15 daqiiqo ah oo ay is waydaarsadeen ilaaladii guddoomiyaha degmada Xamar jajab iyo kooxihii weerarka soo qaaday oo markii dambe u suurto gashay inay goobta ka baxsadaan iyadoo aan la xaqiijin karin qasaaraha soo kala gaaray ilaaladii guddoomiyaha iyo kooxihii soo weeraray.

Dhinaca kale dad goob joogayaal ah oo ku sugan degmada Xamarjajab ayaa waxay xaqiijiyeen in qaraxyadii iyo is rasaasayntii ka dhacday degmada ay sababeen dhaawaca labo qofood oo rayid ah oo suurto gashay in saakay loo qaado goobaha caafimaadka ah ee magaalada Muqdisho.