Xukuumadda Itoobiya ayaa waxay ku gacan sayrtay digniin ay u jeediyeen Xoogagga Islaamiga ee gacabta ku haya inta badan koofurta wadanka Somalia kuwaasoo ku hanjabay in ay duulaan ku qaadi doonaan isla markaana ay weerarro ka fulin doonaan gudahad dalka Itoobiya haddii ay ka laaban waayaan faragelinta ay ku hayaan dalka Soomaaliya.

“Wax dhib ah naguma hayso digniinaha Islaamiyiinta Somalia, dabcan waxa hadalkaasi ka soo yeerayaa waa Al-shabaab oo jecel in dagaal furan ay ku dhawaaqaan, balse awood uma lahan in ay na soo weeraraan ee waa uun iska hadal aan fiiri dheeri loo oran oo looga gol leeyahay in dadka lagu beer laxawsado waayo dadku way ogyihiin in aysan waxba u heynin oo ay yihiin canaasiir dulaaliin gobolka Geeska Afrika uga ah Al-Qaacidda” ayuu yiri Afhayeenka xukuumadda Itoobiya Breket Simon oo warfidiyeenka kula hadlayay magaalada Addis Ababa.

Afhayeenka xukuumadda Itoobiya Barkat Simon ayaa waxa uu sheegay in xoogaggaasi ay mashquul ku yihiin gudaha dalka Soomaaliya isla markaana ay dagaallo kula jiraan dawladda federalka Soomaaliya, wuxuuna intaasi ku daray inuusan marnaba aaminsanayn in xoogaggaasi ay qalqal gelin karaan ammaanka dalka Itoobiya oo ay cashar siinayaan haddii ay soo hawaystaan Itoobiya.

Berket Semon, afhayeenka xukuumadda Itoobiya isagoo hadalkiisa sii wata ayaa waxa uu uga digay xoogagga ururada Islaamiga ah ee Somalia inaanu ku deg degin waxwalba oo dhibaato u keeni karaya sii jiritaanka mustaqbalkooda iyo meelaha ay maamulaan, isagoo dhinaca kalena sheegay in xilligan aanay xukuumadda diyaar u ahayn inay faragelin militari ku samayso dalka Soomaaliya.