---

Qeybtii 11-aad

YOONIS-TUUG IYO SAAXIIBADII

Beribaa waxaa jirey nin la oran jirey yoonis-tuug, yoonis tuug waxaa uu lahaa saaxiibo ay wax isla xadi jireen yoonistuug iyo saaxiibadi waxaa caado u aheyd in ay si xeeladaysan wax u xadaan, waxayna iskula hadli jireen af ay iyagu isla yaqaaniin oo aan dadka kale aqoonin oo way ka dul shixi jiree, maalin maalmaha kamid ah ayaa Yoonis iyo labadiisii saaxiib waxay labo wan oo buur-buuran kasoo xadeen islaan waayeel ah oo ari warabsanaysay, Islaantii xeelad bay u sameeyeen, Yoonis tuug ayaa ku yiri saaxiibadiis islaanta aniga ayaa ariga la waraabinayee idinku xagga dambe intaad ariga ka martaan qaar nooga xada, sidii ayey yeeleen markii arigii labo wan oo buur-buuran ka xadeen ayey u soo noqdeen yoonis tuug oo arigii shubaya, inta ay u yimaadeen ayey arigii la shubeen, iyagoo iska waraysanaya sida ay wax yeeleen, waxayna ku heeseen;

Saaxiibadii:- Labadii tukoow sahankaad tagteen maxaad taransateen?
Saaxiibadii:- Labo turuqyo weyn.
Yoonis-tuug:- Oo xageed dhigteen?
Saaxiibadii:- Tuurtaan (Buurta) dhignay.
Yoonis-tuug:- Billaa haad gablee?
Saaxiibadii:- Waan hoosinee.
Yoonis-tuug:- Billaa hununucee (Qurmee)?
Saaxiibadii:- Waan hawinee.

Sidaas ayeyna Yoonis-tuug iyo saaxiibadii isu afgarteen iyadoo ay islaantii labada wan laga xadayna la joogto.

WELIGAA BEEN MA SHEEGTAY?

Beri baa nin waxa uu caado ka dhigtay oo uu ku sifoobay in uu wax hubsado oo aanu been sheegin. Maalintii dambe ayey dadkii beesha la degenaa waxay ku heshiiyeen in ay ninkaas xeeladeeyaan oo ay been ka sheegsiiyaan waxayna u tageen beel kala oo u dhaweyd, waxayna ku yiraahdeen waxaan rabnaa in aan ninka hebel la yiraahdo in aan maanta been ka sheegsiino, ee idinkana qorshahan nala fuliya, oo beri subax marka la gaaro ayaan waxaan ku oronaynaa hebelow soo fiiri in ay reerkan deriskeena ah muraad qabaan iyo in kale, idinkuna waxaad iska dhigtaan marka uu idiin yimaado wax muraad qaba, sidii ayeyna ku heshiiyeen, markii waagii baryey ayay ninkii ku yiraahdeen war hebelow orodoo reerkan deriskeen ah soo eeg maanta, waxaa la lahaa ducay qabaane, oo war sugan nooga keen, waayahay intuu yiri ayuu fag yiri, waxaa uu u tagay ileen waa arrin la isku ogayahaye meeshii oo dabab waaweyn laga shiday, dibi weyna geed dabka agtiisa ah lagu soo xiray, midiyo af badanna ay dadkii soofaysanayaan, rag, Dumar iyo caruur badanna ay meesha dhoobanyihiin, ninkii markuu intaa arkay ee uu dadkiina weydiiyey ayey ku yiraahdeen ishaa kuu macalin ah oo waad aragtaa in wax waliba ay diyaar ku dhow yihiin ee orod oo raggii u soo yeer, hana soo deg-degeen, ninkii markuu ku soo noqday beeshii dirsatay waxa ay weydiiyeen in ay meesha wax ka jiraan iyo in kale, wuxuuna ugu jiwaabay dabna waa shidnaa dibina waa xirnaa ladeyn doonaana ma ogi, halkii ayeyna dadkii uga quusteen in ay been ka sheegsiiyaan.

Qeytbtii 10-aad halkaan ka Aqriso

Lasoco Qeybta Xigta todobaadka Danbe ama Arbacada Danbe

Fiirio Gaar ah:

Waxaa Qorey Cabdulqaadir Nuur Xuseen (Maax)
Wixii talo ama fikrad ah oo la xiriira Buugyarahan
waxaad igala soo xiriiri kartaan Cinwaankayga ah:
E-Mail: cabdiqadirnur@hotmail.com
Tel:00 2522-4150 622