Barqanimadii maanta ayaa waxaa degmada Guriceel ee gobolka Galgaduud dib ugu soo laabtay wafdi ka kooban ilaa 15 xubnood oo culumaa’udiinka ahlu suna waljameeca uga qeyb galay munaasabada heshiiskii ay la saxiixdeen dowlada Somalia ee dhowaan ka dhacday magaalada Adis ababa ee dalka Itoobiya.

Wafdigan ayaa waxaa horkacayey gudoomiyaha golaha fulinta ee maamulka gobolada dhexe ee culumaa’udiinka Ahlu sunna Shiikh Maxuud Xeefow ayaa waxaa garoonka dayuuradaha degmada Guriceel ka soo dejisay dayuurad gaar ah oo ka soo qaaday Addis ababa, iyadoo ay halkaasina ku soo dhoweeyeen masuuliyiin ka tirsan Ahlu suna waljameeca oo halkaasi ku sugnaa.

Ma jiro illaa hadda war ay saxaafada siiyeen xubnaha Ahlu suna Waljameeca oo ku aadan socdaalka ay ku tageen magaalada Adis ababa iyo heshiiska ay halkaasi kula soo galeen dowlada Somalia hase ahaatee gudoomiyaha golaha fulinta ee maamulka gobolada dhexe ee culumaa’udiinka Ahlu sunna Shiikh Maxuud Xeefow ayaa sheegay in saacadaha soo socda ay war arimahaasi ku saabsan siin doonaan saxaafada.

Dowlada Somalia iyo culumaa’udiinka Ahlu suna Waljameeca ayaa dhowaan ku kala saxiixday magaalada Addis ababa ee dalka Itoobiya heshiis awood qeybsi ah oo labada dhinac ay midoobayaan kaasoo dhigaya in wasiiro iyo xubno kale laga siiyo culumaa’udiinkaasi, isla markaana meel uga soo wada jeestaan Xarakada Mujaahidiinta Al Shabaab iyo Xisbul Islaam oo dagaal uu kala dhexeeyo.