---

Muqdisho waa muraayaddii dalka Soomaaliya wax badan waa loo soo dalxiisi jiray weyna sheekayn jirtay, waxayse aamustay sanadkii 1991-kii wixii ka dambeeyay, sababtuna waxay aheyd wax aysan ka hadli karin ayaa lagu sameeyay xad gudub ayaa lagu la kacay madaafiic ayaa lala dhacay waa la jirdilay dharkii ayaa laga fiiqay indhihii ayaa basbaas iyo baaruud wax loo kala garan waayey looga shubay, shib ayaa ka soo hartay, waxayna warku ku gaabsatay Allaa jooga.

Intii ay madaxda u aheydna waa ay wada saameysay, Muqdisho aamusnaan keliya maysan sameynine xattaa way is eegi kari weyday indhaha ilmedu ka qubaneysay owgeed waxay arki weyday 18-kii muuqeeda sheeda sare kala socday misana islahaa wey xalin doontaa mushkiladaha soo food saaray.

Muqdisho xal ay u hesho iska daaye arrinteedii ayaa sii cuslaatay korkeeda ayaa hub kasta lagu tijaabiyey, wax walba oo xumaan ah waa loo geystay xushmad daro kasta ayaa lagula kacay xishookii bay ka tageen sharafteedii ayaa lagu tuntay, Sheekh Shariif iyo Maras oo idil ayaa lagu hor silciyey muqdisho tan iyo markaas wey aamusneyd, waayo muran joogta ah ayaa ka dul socday dowladii timaadana looma dhamo mana taageersani ayey ku soo idlaaneysay dowladba dowladbay dhashay.

Markii dambe waxay ku soo biyo shubatay in dowlad iyo maxaakiim islami ah dood ay wada galaan waji cusub ayaa masaraxa siyaasadeed ee soomaaliya la kowsadey hada iyo xeelado cusub, wadaado u la bisan qaab miliri ayaa dig soo yiri oo tilmaamaaya in ay ku maamulaayaan dalka dowlad islaami ah dowladii jirteyna maysan la dhacsaneyn hab dhaqankeeda waxay doonaanba ha ka u riyaane faraha ayey is ku fiiq fiiqeen ka dibna waa ay is ku biro tunteen, dagaal ayaa loo sahan tagey, waa la is ku habar wacday,waa la is awood tijaabiyey qolo ayey la liicday si kastaba ha u liicdee koon furtaa la is la aadey sidaas sila mid ah waxaa horey u liicay hogaamiye kooxeedkii in taa ka dib waxaa la soo un key dowladaan hadda jirta oo lagu naaneyso midnimo qaran shacabkii rajo ayaa soo gashay sidiisaba shacabkan waa rajo ku nool weji kasta oo yimaadana teegeero ayuu siiyaa, waxaan kala garan waayey danahooda meesha ay ku jirto inaysan garaneynin iyo inay yihiin hayi raac iyo inay biseyl wadaninimo aysan ku jirin waayo waxay taageereen maamul kasta oo yimaada iyo wixii uu masraxa la yimaada haddana waa ay ku hun goobaan.

Shacabkan waa beylah aqoonyahanadoodiina kaniinkii hurdada ayaa la wada laqsiiyey inta yar oo ka badbaadayna sonkor, dhiigkar iyo isfiilito ayey ka qaadeen wax sheegoodana qof waalan ayaa laga soo qaadaa maamuladana lagama ogola inay lug ku yeeshaan, waayo tuhunkooda ayaa badan.

Doodaha dadka siyaasadda indho indheeya ayaa farta ku godayey waxa ka soconaya dalka, waxayna u arkaayeen kud ka guur oo qanjo u guur, wax walba ayaa la arkay wiil iyo aabahii oo aan salaanta iska qaadeyn qoryana isku heysta, gabar iyo hooyadeed oo kala afkaar noqday, qoys kala irdhoobay xushmaddii waalidnimo ayaa luntay waa la kala dhaqaaqay qaac ayaa la is ku shiday magacyo ayaa la isku bixiyey, kuwaas oo ay ka mid yihiin Murtad, Qwaarij, Mushrikiin, Wadaad xumayaal, Mooryaan garey iyo kuwaas kuwo la mid ah, wadaadadii Diinta ayaa kala miirmay qaarkood waxay taageereen dowladda KMG Soomaaliya, halka kuwo kalena ay taageereen Xarakada Mujaahidiinta Al-shabaab, khilaafkii wuu sii xoogeystay xarig jiidad ayaa bilowday aayado ayaa la is ku daliilshaday, qolo kastana waxay sheegtay inay iyadu saxantahay, qolada kalena aysan heysan wax saxan, arrinkuna waxa uu noqday mindi-mindi ku taag.

Muqdisho indho xumadaas indhaha ayey ka qabsatay mase rajo dhigin rajado laga ma quusto ayuu ahaa hadlaka keliya ay dibnaheeda u kala furto, uqdisho madaxay soo yara qaaday markay maqashay hadalkii afhayeenka Xarakada Al-shabaab Sheekh Cali Dheere oo leh waan ka baxnay Muqdisho, waxayna ku soo baraarugtay dad yaacaaya oo doonaya inay guryahooda dayactirtaan, markas ayey hadashay oo tiri xageed u socotaan Al-xamdu Lilaah guryaheenii ayaan ku laabaneynaa ayey dhaheen dadkii, laakiin mar kale ayey Muqdisho aamustay ka dib markii ay dib u soo labo kacleeyeen dagaaladii ka dhici jiray ee u dhaxeeyay ciidamada AMISOM, kuwa dowladda KMG oo isku dhinac ah iyo kuwa Xarakada Mujaahidiinta Al-shabaab, iyo hadalka beryahan dambe soo baxay ee ah inay Itoobiya u soo socoto, wayna sii naxday markii ay maqashay Muqdisho ayaan ku wajahanahay, waxayna dib u xasuusatay dhibaatadii ay horay ugu geysteen.

Guntii iyo gebagebadii Muqdisho way yara faraxday misana dhoola caadeysay, waayo waxay aragtay wadooyin sanado xirnaa oo is kood u furmay, waxaa kale oo indhaheeda qabteen wadooyin, dukaamadii iyo guryihii ciidamadu saarnaan jireen oo dhismo ku socdo, sidoo kale waxay aratay mas’uuliyiin ku soo qulqulaya xiisana u qaba inay arkaan Muqdishadii hore mid la mid ah, waxayna odorostay nabaddii tallow ma ifafaalo nabadeed baa mise waa maladeyda Allow Nabad nasii Aamiin Aamiin Aamiin ayey tiri Muqdisho oo rajo nabadeed muujinahysa.

Waxaa Diyaariyey:- Suleymaan Sheekh Ismaaciil Paracatamol5@gmail.com

kala soo xiriir
webmaster@falaar.com