---

DUULAANKA KENYA EE DALKA SOOMAALIYA RIYO SOO JIRAAN AH!!

Maqalnay in ciidamo Kenyan ah ay ku soo qulqulayaan gudaha gobalada Gedo iyo Jubbooyinka iyagoo ku andacoonaya inay dantooda daafacayaan, laakiin xaajada ayaa u muuqata halkii ay Soomaalida oran jirtay baroorta Orgigaga ka weyn.

Bishii September ee sanadkan aynu ku jirno ayey aheyd markii uu bilowday damaca ugu weyn ee Kenya ay ku qabsaneyso gobolada koonfureed ee dalka Soomaaliya, walow tan iyo in muddo ahba ay ciidamada Kenyaanku ku riyoon jireen inay mar qur ah u soo gudbaan gudaha Soomaaliya oo ah dhul kheyraard badan uu dhex ceegaago, dadka qaarkood waxay qabaan in duulanka Kenya uu qeyb ka yahay mashruuca Gandi iyo Faransiiska ay ku doonayaan inay ku qabsadaan gobalada Jubbooyinka iyo Gedo, waxaana ognahay in Kenya ay tahay goobtii lagu unkay mashruuca Azaaniya ee Max’ed Cabdi Gaandi uu hormuudka u yahay, taas oo ay jirto ayaa haddana waxaa loo helay marmarsiiyo, taas oo timid ka dib markii ay sii xoogeysteen qafaalka laga geysanayo Jaziiradaha dalka Kenya.

Bishii September ayey aheyd markii la toogtay muwaadin reer Ingiriis ah, isla markaasna la qafaashay afadiisa, waxaana falkaasi uu ka dhacay jaziiradda Lamu ee dalka Kenya, falkan ayaa la sheegay inay si wadajir ah isaga kaashadeen Xarakada Al-shabaab iyo kooxaha Burcad badeeda Soomaalida, haweeneydii la soo qafaalay ayaa la sheegay in hadda lagu hayo qeyb ka mid ah gobalka Mudug, inkastoo ay xusid mudantahay inay Al-shabaab iska fogeeyeen inay wax lug ah ku leeyihiin afduubkaasi.

Sidoo kale isla bishii September ayaa koox kale oo burcad ah waxay ka soo qafaasheen isla Jaziiradda Lamu Haweenay curyaan ah oo u dhalatay dalka Faransiiska, taas oo dalxiis ahaan u joogtay halkaasi, sidoo kale bishii hore ee October ayaa ciidan ka tirsan Al-shabaab waxay xerada Dhadhaab ka soo qafaasheen laba Dumar oo ka tirsan shaqaalaha hay’adda MSF Spain oo howl samafal ah ka waday xeryaha Qaxootiga ee dalka Kenya, wixii ka dambeeyay afduubka shaqaalaha hay’adda MSF ciidamada Kenya waxay bilaabeen dhaqdhaaqa xoogan, waxaana ay damaacinayeen inay gudaha u soo galaan dalka Soomaaliya si ay uga qeyb noqdaan howlgalka ciidan ee ka socda gobalada Koonfureed ee cirifka xuduuda xiga, wayna soo galeen maalmo ka dib, laakiin waxay tahay isweydiintu Kenya uma socoto la dagaalanka Xarakada Al-shabaab iyo difaacidda dalkeeda ee waxay u socotaa qabsashada gobolada koonfureed ee dalka Soomaaliya iyo inay la baxdo kheyraadka dhex ceegaaga badda Soomaaliya iyo ceelka shidaalka ee ku yaala Raaskambooni.

Soo gelitaanka ciidamada Kenya ee gudaha dalka Soomaaliya waxaa ku kala qeybsamay madaxda gugu sareysa dowladda KMG Soomaaliya, waxaana xusid mudan in Madaxweynaha dowladda KMG Soomaaliya Sheekh Shariif Sheekh Axmed uu muujiyey dareenkiisa Madaxweynenimo, wuxuuna si cad u sheegay in ciidamada Kenya ay sharci-daro ku joogaan gudaha dalka Soomaliya, loona baahanyahay inay banaanka ka tagaan oo ay ka baxaan gobolada Soomaaliya, wixii taakulo ahna ay siiyaan ciidamada dowladda KMG, halka Ra’isul wasaaraha dowladda KMG Dr. C/weli Gaas uu isna sheegay in Kenya ay ka garab siinayaan la dagaalanka Al-shabaab, dowladda KMG-kana ay ku ogtahay soo gelitaankooda, taas oo khilaaf ka dhex abuurtay madaxda sarsare ee dowladda KMG, inkastoo markii dambe la sheegay in hoose loo xaliyey ka dib markii ay dowladaha Soomaaliya iyo Kenya heshiis kala saxiixdeen.

Arrinka naxdinta leh ayaa waxay tahay in Ra’isul wasaaraha Kenya iyo Wasiirka arrimaha dibadda Kenya oo saxaafadda kula hadlay gudaha Kenya ayaa waxay sheegeen inay tahay talaabo sax ah gelitaankooda gudaha Soomaaliya, isla markaasna ay baacsanayaan sida uu yiri Al-shabaab, laakiin Wasiirka difaaca oo Kenya Yuusuf Xaaji oo Muqdisho safar ku yimid hadda ka hor ayaa sheegay in ciidamadooda aysan gelin anay joogin gudaha Soomaaliya, isla markaana ciidamada ka dagaalamaya gudaha Soomaaliya ay yihiin sida uu yiri kuwa dowladda KMG, taas oo uu markii dambe ku fashilmay sida muuqata, ka dib markii ay dagaalo dhexmareen ciidamada Xarakada Al-shabaab iyo kuwa Kenya.

Prof Cabdi Xuseen oo ka tirsan Jaamacadda Soomaaliya ee Muqdisho kana soo jeeda dhulka ismaamulka Soomaalida ee Kenya ayaa sheegay in talaabada ay ciidamada Kenya ku soo galeen Soomaaliya ay tahay mid gardaro ah, isla markaasna aysan habooneyn xilligan in talaabadan lagu kaco, sidoo kale waxaa xusid mudan in shacabka Soomaaliyeed dhammaantood ay ka soo wada horjeesteen joogitaanka ciidamada Kenya ee gudaha dalka Soomaaliya, kuwaas oo sheegay inay ku taageersanyihiin Madaxweyne Shariif hadalkiisii ahaa in Kenya ay dalka uga baxdo, faragelintana ay ka deyso.

Suurtagalnimada qorshaha Prof. Gandi:- Sheekooyinka ugu badan ee ay dadka hadal hayaan ayaa ah inay u badantahay faragelinta inay qeyb ka tahay qorshaha Gandi uu ku doonayo in maamulka la baxay Azaaniya uu kaga howlgeliyo gobalada Gedo iyo Jubbooyinka, horay ayey Siyaasiyiin, Odayaal iyo Xildhibaano uga dalbadeen dowladda Kenya inay joojiso gacan siinta Gaandi ee ku aadan hirgalinta maamulka Azaaniya, waxaana xusid mudan in Kenya qudheeda ay leedahay qorsha ay isugu balaarineyso Soomaaliya, waxaana dadka qaarkood ay leeyihiin duulaankan waxa uu qeyb ka yahay mashruuca Maraykanka ee la dagaalanka waxa loogu yeero argagixisada, kaas oo qeyb ahaan loo wakiishay ciidamada Kenya inay fuliyaan.

Hanjabaada Shabaab:- Xarakada Mujaahidiinta Al-shabaab waxay sheegtay inay qaadi doonaan weeraro xoog leh oo ka dhan ah ciidamada Kenya eek u soo gardarooday gudaha dalka Soomaaliya, isla markaasna ay beegsan doonaan daaraha dhaadheer ee Kenya si ay Kenya u dareensiiyaan quwadooda, waxaana arrintaasi darteed hadda ka taagan gudaha dalka Kenya gaar ahaan magaalada Nairobi oo xarun u ah Kenya weeraro bambaanooyin oo si sidaba joog ah loogu weerarayo.

Waxaa Diyaariyey:- Axmed Warsame Email:- ahmed.warsame@keydmedia.net

kala soo xiriir
webmaster@falaar.com