Qarax saakay lala beegsaday ciidamo Itoobiyaan ah oo lug ku marayay agagaarka Hotel Weheliye ee waddada Maka Al-Mukarrama

Saakay aroortii ayaa waxaa qarax miino lala beegsaday ciidamo Itoobiyaan ah oo lugeynayay agagaarka Hotel Weheliye ee waddada Maka Al-mukarrama kaasoo ay qasaaro ka soo gaartay ciidamada Itoobiya, sida ay xaqiijiyeen dad goobahaasi ka ag dhowaa.

Ciidamadan Itoobiyaanka ah ee qaraxa lala beegsaday ayaa waxay ka yimaadeen dhinaca Xarunta madaxtooyada kuna sii jeeday fariisinta ay ku leeyihiin nawaaxigii gurigii hore ee shaqaalaha, waxaana sida looga bartay ay ciidamadaasi subax walba baaritaan ku sameeyaan waddada dheer ee isku xirta isgoysk KM4 ilaa xarunta madaxtooyada.

Qaraxa kaddib ayaa ciidamada waxay bilaabeen inay rasaas aan loo meel dayin furaan, iyadoo dadka deegaankaasi ku dhaqan ay xaqiijiyeen in ciidamada Itoobiya ay halkaasi ku dileen labo qof oo rayid ah oo mid ka mid ah uu yahay oday da’ ah oo ka soo baxay gurigiisa una soo jeeday goob ganacsi oo uu ku lahaa suuqa Bakaaraha.

Qaddar daqiiqado ah ayay ciidamada Itoobiya goobtaasi ka xayireen dhaq-dhaqaaqa dadka iyo gaadiidka, inkastoo markii dambe ay halkaasi isaga tageen, jawiguna uu caadigiisii ku soo noqday.