Madaxweyne C/laahi Yuusuf oo sheegay in heshiiska ay soo saxiixeen isaga iyo ra’iisul wasaare Nuur Cadde aanu saameyn ku yeelan doonin mooshinka ka dhanka ra’iisul wasaaraha

Madaxweynaha dawladda federalka Soomaaliya C/laahi Yuusuf Axmed oo isaga iyo ra’iisul wasaare Nuur Xasan Xuseen (Nuur Cadde) iyo guddoomiyaha baarlamaanka Sheekh Aadan Madoobe ay shalay gaareen magaalada Baydhabo ee xarunta gobolka Bay ayaa ka dhawaajiyay in heshiiska ay soo kala saxiixdeen isaga iyo ra’iisul wasaare Nuur Cadde aanu waxba ka beddeli doonin mooshinka ka dhanka ah ra’iisul wasaaraha oo ay wadaan xubno ka tirsan baarlamaanka federalka Soomaaliya.

Madaxweyne C/laahi Yuusuf ayaa sheegay in shaqsi ahaan khilaafkii kala dhexeeyay ra’iisul wasaaraha uu soo afjarmay isla markaana ay qodobo dhowr ah ku soo heshiiyeen, ha yeeshee mooshinka ka dhanka ah ra’iisul wasaaraha uu halkiisii taagan yahay oo aanay ka mid ahayn waxyaabaha la xalliyay oo laysku soo af gartay.

Madaxweyne C/laahi Yuusuf ayaa sheegay in baarlamaanka uu yahay hay’ad sharci dejineed oo koontaroosha tasarufaadka iyo shaqada dawladda iyo xukuumadda, wuxuuna intaasi ku daray in xildhibaanada ay xor u yihiin inay mooshin ka dhan ah ra’iisul wasaaraha hor keenaan baarlamaanka.

Dhowaan ayay ahayd kulan ka dhacay xarunta ADC ee magaalada Baydhabo oo uu shirguddoominayay Guddoomiye ku xigeenka koowaad ee baarlamaanka Prof. Maxamed Cumar Dhalxa ay xildhibaanada baarlaamanka u gudbiyeen guddoonka baarlamaanka mooshin ka dhan ah ra’iisul wasaare Nuur Xasan Xuseen (Nuur Cadde) taasoo buuq iyo kala qeybsanaan ka dhex dhalisay baarlamaanka.

Prof. Dhalxa ayaa sheegay in mudanayaal badan oo ku xusnaa warqadda loo gudbiyay guddoonka baarlamaanka ay si cad u sheegeen in laga been abuurtay oo aanay iyaga haba yaraatee waxba kala socon arrintaasi, halka kuwo kalena ay sheegeen inay ka laabteen, wuxuna intaasi ku daray in ay suurto gal tahay in haddii arrintu sidaasi tahay uu meesha ka baxayo mooshinkaasi ka dhanka ah ra’iisul wasaaraha.