Madaxda ugu sarreysa dawladda federalka Soomaaliya oo lagu wado inay maanta qudbado ka jeediyaan kulanka xubnaha baarlamaanka oo ka dhacaya xaruntooda ADC

Waxaa saakay lagu wadaa in xarunta ADC oo ah hoolka ay ku shiraan mudanayaasha baarlamaanka uu ka dhaco kulan ay ka soo qeyb gelayaan madaxda ugu sarreysa dawladda federalka Soomaaliya oo iyagu shalay gaaray magaalada Baydhabo ee xarunta gobolka Bay.

Mudanayaasha baarlamaanka federalka Soomaaliya oo intooda badan ay ku sugan yihiin magaalada Baydhabo ayaa saakay ku sii qulqulaya xarunta ADC iyagoo aad u daneynaya ugana war dhowraya qudbadaha ay halkaasi ka jeedin doonaan madaxweynaha iyo ra’iisul wasaaraha.

Madaxweynaha dawladda federalka Soomaaliya C/laahi Yuusuf Axmed iyo ra’iisul wasaare Nuur Xasan Xuseen Cadde ayaa lagu wadaa inay maanta baarlamaanka uga warbixiyaan safarkoodii magaalada Addis-ababa ee dalka Itoobiya iyo halka uu ku dambeeyay khilaafkii u dhexeeyay labadooda.

Waxaa si weyn loo adkeeyay ammaanka guud ee magaalada Baydhabo iyadoo ciidamada booliska dawladda federalka ee dhowaan lagu soo tababaray dalka Itoobiya ay soo buux dhaafiyeen guud ahaanba gudaha magaalada Baydhabo gaar ahaanna xarunta shirarka baarlamaanka iyagoo aad u hubeysan.