Maleeshiyadii uu horkacayay Col. Barre Hiiraale oo saakay isaga baxay Degmada Baardheere ee gobolka Gedo

Maleeshiyadii uu hogaaminayay Col. Barre Aadan Shire (Barre Hiiraale) oo looga soo awood roonaaday dagaal ay kula galeen magaalada Kismaayo kooxaha Al-shabaab, labadii maalmood ee ugu dambeysayna ku sugnaa gudaha degmada Baardheere ayaa saakay guud ahaanba halkaasi isaga baxay.

Wararka laga helayo magaalada Baardheere ee xarunta gobolka Gedo ayaa sheegaya in maleeshiyada uu horkacayay Col. Barre Hiiraale oo ku hubeysan gaadiidka dagaalka ay u sii jiheysteen dhinaca degmada Doolow oo ku taalla xadka kala qeybiya Soomaaliya iyo Itoobiya.

Xildhibaan Barre Aadan Shire (Barre Hiiraale) iyo maleeshiyada uu wato ayaa ka bixitaankooda magaalada Baardheere waxa ay ka dambeysay cadaadis ay ku saareen waxgaradka iyo odayaasha beesha Sade ee ku aaddan in uu isaga baxo magaalada Baardheere si loo baajiyo dagaal dhiig badan ku daata oo gudaha degmada Baardheere ku dhex mara maleeshiyadiisa iyo kooxda Al-shabaab oo iyagu gacanta ku haya Degmada Baardheere.

Sidoo kale ciidamadii ka tirsanaa xoogaga hubeysan ee Al-shabaab ee baacsanayay maleeshiyada Col. Barre Hiiraale ayaa iyagana lagu soo warramayaa inay u soo ruqaansadeen dhinaca degmada Diinsoor ee gobolka Bay.

Waxaa saakay gudaha degmada Baardheere laga dareemayaa xaalad deggenaansho iyadoo dadkii horay uga barakacay degmadaasi ay haatan bilaabeen inay dib ugu soo noqdaan guryahooda, waxaana sidoo kale saakay si caadi ah u socda dhaq-dhaqaaqa ganacsiga, dadka iyo gaadiidkaba.