Labo qof oo walaalo ah oo mid yahay sheekh caan ah oo aano qabiil loogu dilay deegaanka Yaaq-bari wayne ee degmada Wanlawayn

Koox dabley ah ayaa xalay weerar gaadmo ah ku qaaday isla markaana dilay labo qofood oo walaalo oo ku sugnaa guryahooda oo ku yaalla duleedka deegaanka Yaaq-bari wayne oo 20 km koonfur galbeed kaga beegan degmada Wanlawayn ee gobolka Sh/hoose.

Labadan qofood ee walaalaha oo ay kooxahani hubeysan dileen ayaa midkooda waxa uu yahay sheekh caan ahaa oo ka tirsanaa culimaa’udiinka ugu waaweyn ee degmada Yaaq-bari wayne.

Dilka labadan qofood ee walaalaha ah ayaa waxa uu salka ku hayaa aano qabiil oo beryahanba u dhexeysay labo beelood oo halkaasi wada dega oo horay dhowr jeer sidan oo kale dad isaga dilay.

Maydka labadan qofood ee xalay la dilay ayaa maanta lagu wadaa in lagu aaso tuulada Yaaq-bari wayne ee degmada Wanlawayn iyadoo dadka ku dhaqan deegaankaasi ay soo wajahday cabsi aad u weyn ee la xiriirta saameynta ay ku yeelan karto dilka loo geystay labadan qofood, waxaana tuulada Yaaq-bari wayne laga dareemayaa dhaq-dhaqaaqyo ciidan iyo isu qaylo dhaamin ay wadaan beelaha ay ka dhasheen labada qofood ee la dilay.

Dilka loo geystay labadan qofood ee salka ku haya aanada qabiil ayaa ku soo beegmaya xilli ay deegaanadaasi intooda badan gacan ku haynteeda la wareegeen xoogaga ka soo horjeeda joogitaanka ciidamada Itoobiya iyo dawladda federalka, mana cadda tallaabada ay xoogaggaasi hubeysan ka qaadan doonaan xiisada colaadeed ee soo dhex cusboonaaday labadan beelood.